[測試] 機械鍵盤激改軸間紙&熱插拔燈座 !

josephchoi

話說前排用2舊水砌左隻分區壓力既60%鍵盤
http://www.hkepc.com/forum/viewthread.php?tid=2423959

用落一排, 覺得都係有少少唔順手
主要係我無名指真係唔多夠力, 就算係用gateron 黃軸, 喺home row 4隻手指一齊禁落去, 都係好明顯係無名指要用最多力
所以~係時侯要善用下無定位板方便拆軸蓋呢個優勢, 一於換左d彈弓佢
再者, 喺我拆鍵帽時發現, 原來唔用定位板既話, 隻軸只靠左右2隻腳+2隻焊腳hold 住, 係有d唔夠穩!
搖一搖佢竟然搖得郁 咁搞法換多幾次鍵帽咪越來越鬆?
既然都拆得軸蓋, 一於焊埋熱插拔燈座落去 , 唔係為左要燈, 係為左焊多兩隻腳令粒軸更加實淨咁痴住塊PCB
再順便試埋"軸間紙"呢樣野, 之前見過外國有人加軸間紙, 話可以改善軸心搖晃喎~
咁既然我呢隻用gateron 軸, 搖得咁勁, 一於試下加左軸間紙會唔會有改善!

改造大計 :
1. 無名指鍵位將Gateron 黃軸改45g彈弓
2. 所有軸加熱插拔燈座, 增加軸同PCB之間既穩定度
3. 所有軸加軸間紙, 試下會唔會減低軸心搖晃程度

拆軸蓋~!
(呢個方法我都係網上睇番黎, 各位慎用, 個人覺得有拆爛軸蓋既風險)

先用鑷子(貼模型貼紙嗰d) 篤落粒軸其中一邊兩個窿, 然後向內用力(圖中咁樣就順時針方向用力)


聽到啪一聲軸蓋彈起一邊後, 揾d硬野攝住佢, 我就拎萬字夾拗彎攝住


之後左手hold 住隻萬字夾, 右手用鑷子篤落粒軸另一邊兩個窿, 又係向內用力(圖中咁樣就係逆時針方向用力)
唔好一下子用好大力, 用下力放鬆下,用下力又放鬆下咁, 咁樣會容易成功d


成功拆到軸蓋, 貼張軸間紙上去


裝埋熱插拔座


黃軸原裝彈弓同45g 彈弓對比


經過一段漫長既時間(再焊埋PCB後面熱插拔座腳), 終於完成


裝完熱插拔燈座, 梗係要試試, 就拎粒caplock黎試, 一試得左, 而家著caplock 有指示燈了, 仲幾靚仔

改裝完試手感
1. 黃軸改輕左後(其實即係變左紅軸), 整體手感順手左, 無名指唔再覺得要特別用力, 目標達成!
2. 加左熱插拔燈座, 再用手搖下粒軸, 搖唔郁了  目標達成!
3, 加左軸間紙, 拔左鍵帽用手搖下軸心, 同另一隻無加軸間紙既gateron 軸對比, 好似無分別.....
其實個原理係增加上蓋同下蓋既摩擦力, 個蓋密合得好d, 令軸心更穩定, 可能因為我手頭上d gateron軸, 個軸蓋本身都密合得幾好, 所以就算加唔加軸間紙都分別不大(但呢個改造都幾麻煩, 真係諗清楚至好做 )

alan216hk

超高難度